Sigurður Kr. Jónsson fæddist 8. ágúst 1933 á Sölvabakka í Engihlíðarhreppi. Hann lést á Heilbrigðisstofnun Norðurlands á Blönduósi 23. ágúst 2017.
Sigurður Kr. ólst upp á Sölvabakka en flutti til Blönduóss og bjó þar alla tíð ásamt konu sinni. Hann lærði húsasmíðar og rak ásamt fjórum félögum sínum Trésmiðjuna Fróða í áratugi. Hann var framkvæmdastjóri Byggðatryggingar hf. í mörg ár og starfaði síðan fyrir Tryggingamiðstöðina á Blönduósi í áratugi. Sigurður starfaði í mörg ár með Leikfélagi Blönduóss og í björgunarsveitinni Blöndu. Hann hafði gaman af söng og var í kvartett undir stjórn Jónasar Tryggvasonar. Sigurður hafði gaman af laxveiði og stundaði laxveiðar af miklum móð, aðallega í Blöndu og einnig í öðrum ám.